فضيحة بنك QNB فلوسي اتسحبت من الحساب بدون علمى والبنك بيتهرب
بكتب البوست ده علشان أحذر أي حد ناوي يفتح حساب في بنك QNB، لأن اللي حصل معايا هو قمة الإهمال والتجاهل وعدم احترام حقوق العملاء.
تفاصيل المشكلة:
كنت ببيع حاجة أونلاين، والعميل حول لي 8000 جنيه يوم 30/6/2025 على حسابي في QNB، وكان معايا شوية فلوس كمان، فعملت عملية بمبلغ 10,800 جنيه.
تاني يوم فتحت الحساب، لقيته بالسالب أكتر من 7,700 جنيه!
رحت البنك، قالولي:
“أنت كنت عامل عملية بـ8000 قبل دي!”
طيب لو كده، إزاي الحساب يسمحلي أعمل عملية بـ10800؟
فين الرقابة؟ فين النظام؟ فين المساءلة؟!
بعد شكاوى كتير، كلمت مدير خدمة العملاء أ/ محمد الشناوي، واللي قاللي بالنص:
“مش هقدر أعملك اعتراض على العملية، لأن البنك ما بيعملش كده أصلاً!”
يعني ببساطة رفض يخليني أقدم طلب رسمي أعترض فيه، وده أبسط حق لأي عميل في أي بنك محترم.
مدير الشكاوى أ/ محمد زعير كمان قاللي:
“الفلوس مش معانا، روح للراجل اللي بعتلك وحلها معاه، وإحنا عايزين فلوسنا منك!”
يعني البنك بيتهرب من مسؤوليته، وبيطالبني أسدد مبلغ أنا مش السبب فيه.
المفاجأة؟
الراجل اللي بعتلي الفلوس بعتلي مكالمة مسجلة بينه وبين خدمة العملاء في بنكه، بيسألهم:
“هل الـ8000 اللي بعتهم يوم 30/6 رجعوا لي؟”
ردت الموظفة:
“لا، العملية ناجحة ومفيش حاجة رجعت لحسابك.”
وبدل ما البنك يحقق أو يرد رسمي…
بعتولي خطاب مليان أخطاء، مفيهوش توقيع، ولا ختم، ولا تاريخ، وبيقولولي فيه إنهم هياخدوا إجراءات قانونية ضدي لو ما دفعتش!
يعني بدل ما يصلحوا غلطتهم، بيهددوني!
لكل اللي بيفكر يتعامل مع QNB:
اعرف إن البنك ما بيحميش حقوقك، وبيتهرب وقت الجد، وخدمة العملاء بترفض حتى تمارس أبسط حقوقك.
